ACTIVIDADES DO OUTONO EN TRES ANOS

Na aula de tres anos os alumnos e as alumnas están a traballar sobre o outono. Nestas imaxes están a buscar sementes de árbores para plantalas despois. Neste caso trátase de landras de carballo americano e sementes de pradairo. Tamén puideron estudar de preto unha lesma e unha vacaloura. A primeira devolvérona despois ao seu medio; a vacaloura (ou escornabois), atopámolo xa seco! Se atopades unha vacaloura viva respectádela, porque están en perigo de extinción e, polo tanto, están protexidas.

TRABALLANDO SOBRE O OUTONO

As alumnas e os alumnos de Educación Infantil de 4 anos estiveron a investigar e a traballar sobre o outono. Como vedes nas imaxes investigaron sobre diferentes follas e sementes de árbores. Algunhas destas sementes plantáronas para estudar como nacen e medran as árbores. Tamén fixeron carteis cos nomes das árbores. E fixeron collares moi chulos!

VACALOURA

A semana pasada puidemos observar nas aulas unha vacaloura (tamén se chama escornabois), que é un escaravello enorme, do que destacan as súas impoñentes mandíbulas. Esta vacaloura apareceu así seca, pero se vedes unha viva non lle fagades dano! As vacalouras están en perigo de extinción, e por iso están protexidas.
Aquí podedes ver os debuxos que fixeron as alumnas e os alumnos da aula de 5 anos. E tamén unha foto do exemplar que tivemos a sorte de poder observar.

OUTONO!!

O outono é unha estación do ano moi interesante porque é a época en que maduran moitos froitos e na que a natureza se prepara para o frío do inverno. Así, moitas árbores e arbustos perden as súas follas e moitas outras se dispoñen a descansar despois de todo o traballo que tiveron que facer durante a primavera e o verán. Nas aulas de Educación Infantil están a estudar moitos elementos das árbores e os arbustos durante o outono, como as sementes ou as follas.

Comezo do outono 2017

Este ano o outono comezará o 22 de setembro ás 22 horas e 2 minutos, hora oficial peninsular, segundo cálculos do Observatorio Astronómico Nacional (Instituto Xeográfico Nacional - Ministerio de Fomento). Durará 89 días e 20 horas, e rematará o 21 de decembro, día no que comeza o inverno.

Respecto aos planetas, o ceo outonal pola mañá estará dominado por Marte durante toda a estación, Venus ata o mes de decembro e Xúpiter desde novembro ata fins de outono, mentres que Saturno ata primeiros de decembro e Xúpiter ao principio da estación, serán visibles no ceo vespertino.

O domingo 29 de outubro terá lugar o cambio de hora e entraremos no horario de inverno.

Esta información está recollida da páxina do Instituto Xeográfico Nacional que tedes aquí abaixo e que podedes consultar se queredes ter máis información:

http://astronomia.ign.es/inicio-de-las-estaciones

COMEZAMOS UN NOVO CURSO!!

Benvidas e benvidos ao novo curso 2017-2018!! Outro ano máis comezamos con moitos ánimos e gañas de traballar polo Medio Ambiente. Neste curso imos facer moitas actividades relacionadas coa Natureza e co noso patrimonio material e cultural, especialmente o relacionado coa auga e coas tradicións que chegaron ata nós. Esperamos disfrutar e aprender moito!!

ANIMAIS