De Fisterra a Portosín

Reacción química ácido-base

Este xoves fixemos na aula un experimento que amosa unha reacción química entre un ácido e unha base. O ácido era vinagre e a base bicarbonato sódico. A combinación das dúas sustancias, ao producir CO2, foi quen de inchar un globo primeiro e apagar unhas velas despois. Concentrámonos tanto no experimento que non nos lembramos de facer fotos!

Cando se mesturan o vinagre e concretamente o ácido que leva, que é o ácido acético (CH3COOH), e unha base que é o bicarbonato sódico (NaHCO3) prodúcese dióxido de carbono (CO2) entre outros produtos. Este gas libérase en forma de burbullas, tendea escaparse da botella e chega ata o globo provocando que este se inche.

Ao deixar de producir as burbullas, a reacción química terminouse e o globo non se inchará máis.

Se despois de quitar o globo tapamos a boca da botella e deixamos saír o CO2 sobre unhas velas acendidas, apáganse.

Como en todas as nosas sesións experimentais o alumnado propón unha hipótese sobre o que sucederá, observa os resultados e procura unha explicación ao desenvolvemento do experimento.

Club de Ciencia

O profesorado integrante do Club de Ciencia tivo o mércores pasado unha segunda sesión de formación co profesor Xosé Viñas, a quen tivemos a sorte, por segunda vez, de telo con nós. Xosé Viñas é profesor de Biología e Geología no IES David Buján de Cambre. Foi coordinador de escola piloto en varios proxectos de ciencia europeos (XploreHealth, InGenious, FuturEnergía ou Go-Lab) e asesor pedagógico de European Schoolnet no proxecto “Global Excursion”.Tamén é formador, e colaborador en proxectos como; NextLab, Erasmus+”Be a maker@school” e “In the Cloud (Internet das cousas)”, e proyectos internacionais como WorldBiotech y Design Squad Global, ambos da Association of Science-Technology Centers (ASTC) de EEUU. Polos seus proxectos ten recibido diferentes premios.

No noso colexio levamos a cabo diferentes actividades, coas que, ademais de aprender moito, pasámolo xenial.

Terrarios en 4º de Educación Primaria

O alumnado de 4º de primaria estivo deseñando e facendo os seus terrarios. Que artistas!!!!

Plantando no horto

Nesta primavera todas as aulas están a participar nos traballos do horto, tanto na súa preparación como plantando diferentes hortalizas e plantas. Xa levamos plantados xudías, calabacíns, leitugas, berenxenas, pementos, tomates corazón de boi, allos, cebolo e tomates. Ademais, cambiamos os invernadoiros de lugar, temos un novo espazo e xeito de gardar as ferramentas e estamos a empregar técnicas tradicionais para dispoñer dos cultivos (canas, rafia...). Aquí podedes ver algunhas das numerosas accións que as diferentes aulas están a levar a cabo. Na páxina de Instagram do colexio podedes ver as actividades día a día.

O arco da vella das densidades

Esta semana na aula de 4º de Educación Primaria fixeron este experimento para traballar as densidades. Para iso houberon de aventurar hipóteses e comprobar os resultados das mesmas. Nestas imaxes podedes ver o ben que resultou!

A voltas coas patacas!

O alumnado de 1º de Educación Primaria estivo traballando coa patacas. Aquí podedes ver todo o proceso que levaron a cabo, desde que xermolaron ata que se plantaron no horto. Igualmente, plantaron porros. Traballaron moi duro!

A NOVA LAGOA

Mirade como se volveu facer a nosa lagoa! Moitas grazas a todas e a todos pola vosa axuda e participación. Quedou unha lagoa moi chula!

Experimento sobre densidades de líquidos

Hoxe na  aula de 5º de Primaria fixeron un experimento para determinar a diferencia de densidade entre varios líquidos (auga, alcohol, leite condensado, mel e aceite). Cada equipo elaborou hipóteses, probounas e finalmente estableceu a gradación de densidades, o arco da vella de densidades, correspondente. Neste vídeo podedes ver unha parte do proceso de investigación.